مش هتندم بجد

هو بصراحه مش انا اللي كتبه الموضوع ده انا عملالوا كوبي بس انا مقتنعه بيه جدا
وعايزه افهم الناس اللي انا فهمتوا

دلوقتي احنا عندنا فريقين فريق بيقول نعم وفريق بيقول لا ةكل فريق فيهم بيضم سياسين ومفكرين كبار وانا واحده من الناس اللي كنت محتاره أختار ايه فقلت أستخدم اسلوب الراي والراي الاخر وامشي في الطريقين واشوف كل واحد فيهم هيعملنا ايه ؟؟؟
***************
عندنا أول فريق اللي بيقول نعم
يضم فيه الاخوان المسلمون والتيار السلفي( اللي شوفته ورقهم اللي وزعوه علينا في الجامعه علشان نقول نعم وتحتها الإمضاء أنا سلفي )
و شخصيات كبيرة كالأستاذ فهمي هويدي ود.محمد سليم العوا والكاتب :معتز عبد الفتاح ,و الناشطة :نوارة نجم...وكتير غيرهم.

الفريق اللي بيقول لا :
شباب ائتلاف الثورة والأشخاص اللي ناويين يرشحوا نفسهم للرئاسه
و شخصيات كبيرة زي المستشارة تهاني الجبالي و عمروخالد وعمرو حمزاوي وابراهيم عيسى ...وغيرهم

الفريقين دول بيتحدوا في شويه أسس وأهداف وهي :
1-دستور جديد :
والاختلاف بينهم كان على الميعاد اللي هنبدأ نعمله فيه
2-إن الاتنين عايزين الجيش يرجع ثكناته ومده الحكم العسكري متطولش أكتر من كدا
3-انتخابات نزيهة ومفيش فيها أي تزوير
4-رئيس منتخب بإراده الشعب ومدته وصلحياته محدده
5-المعظم موافق على التعديلات كمواد دستورية ماعدا جزئية تعيين نائب الرئيس وليس انتخابه وناس قليلة معترضة على موضوع الجنسية

ولنفترض جدلا إني هقول نعم هيكون النتيجه ايه ؟؟

1-مجلس شعب وشورى مكون من أشخاص لهم مصالح في دوائرهم وطبعا هتكون الأولويه لأصحاب الخبرات السابقه في موضوع الاانتخابات والفرق انها هتكون انتخابات من غير تزوير

2- هيتعمل جمعيه تأسيسه من داخل البرلمان علشان تعمل الدستور الجديد وطبعا الشعب مش موجود في الموضوع ده لان اللي هيختار الناس اللي هيعملوه هما اعضاء المجلس منهم فيهم

3-الدستور الجديد مش هيتعمل بسرعه قولوا هياخدله سنه ع الأقل بس هيتعمل تحت إشراف رئيس موجود ولم تحدد صلاحياته متنسوش ان التعديل الجديد ممسش صلاحيات الرئيس خالص يعني من حقه الاعتراض ع المواد اللي مش على مزاجه بمعنى اوضح (دعوه لتكرار عصر الظلم )
ومتقولوليش لو معجبناش هنتظاهر لان ارواح الشهداء التفريط فيها مش سهل كدا .....

4-الجيش هيرجع ثكناته تاني بعد تقريبا 4 شهور لان ساعتها مفيش داعى لوجوده والحكم العسكري هيكون انتهى

5- بعد الموافقه ع الدستور الجديد هيتم حل مجلسي الشعب والشوري وكمان عمل انتخابات رئاسيه وبرلمانيه جديده من اول وجديد (( طيب بالذكاء كدا ليه اللخبطه دي ))

النتيجه :

مجلس شعب وشورى في ظل دستور قديم سوري في اللفظ (مرقع ) مقربناش فيه لصلاحيات الرئيس إطلاقا ورئيس ليه الحقبحكم الدستور اللي معدلش صلاحياته بالاشراف على التعديلات الدستوريه

لو قلنا لا هيحصل ايه فكروا معايا :

1- هنرجع لدستور 71 اللي الشعب اسقطه والي الرئيس اسقطه بالطريقه الغير دستوريه اللي مشي بيها

2-رئيس المحكمه العسكريه هو اللي هيمسك الحكم لان وجود الجيش في الحكم أمر غير دستوري أو ان الشعب ينتخب هيئه حكم ثلاثي مؤقته من ضمنها حاكم عسكري

3-مفيش قدام لا الجيش ولا حتى المحكمه الدستوريه غير انهم يعلنوا عن دستور مؤقت فيه المواد اللي اتحطت في الاستفتاء وشويه مواد تانيه بتشرح مهامهم ايه وصلاحياتهم

4-الجيش برده هيرجع لثكناته لان وقتها هيبقى مفيش داعي لوجوده في الحكم

5-وقتها هيدعوا لجمعيه تاسيسيه تقوم بعمل الدستور الجديد بس من الشعب نفسه مش من اعضاء برلمان زي ماهيحصل لو قلنا نعم وبرده في الوقت الي هيتعمل فيه الدستورنكون بندي فرصه للعناصر السياسيه المختلفه انها تستعد لدخول الانتخابات الرئاسيه بدل ماهي حاليا محصورة بين اخوان مسلمسن وبقايا الحزب الوطني

6-بعد مايتعلن عن الدستور الجديدويتوافق عليه وقتها بقى هنعمل انتخابات برلمانيه ورئاسيه تبع الدستور الجديد اللي أقره الشعب

النتيجه من ده:

انتخابات برلمانيه ورئاسيه في ظل دستور الجديد والكل فرصته في المشاركه متساويه
والشعب كمان كان عنده فرصه المشاركه في وضع الدستور الجديد للبلاد

وفي النهايه للي بيقول عايزين المصالح تمشي بقى وكفايه كدا ، المصالح مشيت خلاص والعقل بيقول لو هنصلح نصلح بجد ونشيل جذور الفساد اللي لسه موجوده وبدل ماتدي رئيس جديد
الفرصه يتحكم في الدستور الجديد اللي هيتعمل لانك محددتش اي حاجه في صلاحياته وتبقى دعوه للفساد من جديد نصبر شويه يا جماعه ونبتدي على نضافه بقي زهقنا وقرفنا من الظلم بدل ماهما عمالين يخيطولنا ويعدلولنا دستور غبي بيعامل الشعب على انهم مسيرين مش مخيرين

وفى الاخر حريه الرأي مكفوله للجميع أكيد

أنا هـــــــــــــــــــقــــــــــــــــــــــول لالالالا