أسامة منير

موضوع: أسامة منير الإثنين فبراير 21, 2011 9:45 pm

أسامة منير :
مساء الخير أعزائى المشاهدين و حلقة جديدة من برنامجكم أنا و النجوم و هواك و يسعدنى استقبال تليفوناتكم و ايميلاتكم طول مدة الحلقة , و موضوع حلقة النهارده عن ...... و لا أقولكم .... هنخليها حلقة مفتوحة و نفضفض فيها مع بعض كده فى مشاكلكم العاطفية .... فل يا جماعه ؟ يلا أنا مستنى أهو ..... ايه ...محدش لسه اتصل يعنى !! طيب لحد ما يجيلنا تليفونات نقرا الايميلات بتاعه النهارده ..... لا اله الا الله مافيش ولا ايميل اتبعت ..... ايه يا جماعه انتوا بتستهبلوا و لا ايه ؟؟ طيب لحد ما تجيلنا تليفونات أو ايميلات نسمع مع بعض قصيدة ( قارئة الفنجان ) لعبد الحليم حافظ و بعدها نرجع لبعض تانى
بعد ساعتين
أسامة : و رجعنا لبعض تانى و احنا بنعتذر كان فيه عطل فى التليفونات بس ... أصل السماعه ما كانتش محطوطة كويس فالحرارة اتقطعت و النت كمان كان قاطع .... بس خلاص ظبطنا المسائل و كله تمام ... يلا بقى مش معقول كده , ساعتين و لسه مابتديناش الحلقة
وما اديتش نصايحى الفظيعه لحد لسه ... ايه ده أخيرا تليفون ... اسمحوا لى نستقبل أول اتصال معانا و نقول الووو ...
* آلو السلام عليكم
_ و عليكم السلام... نتعرف بيك
* ايه ده يا سمسم ...انت مش عارف صوتى
_ لا مش واخد بالى بصراحه .... مين معايا ؟
* لا و الله كده أزعل منك يا أسامة
_ يا عم خلصنى هو انا ناقصك ....دى ليله ايه السودة دى ؟
*أنا صلاح يا سمسم
_ آاااااااااه ما هو باين من أوله ...هو أيه أصله ده ؟ ايه صلاح دا ... صلاح ذو الفقار يعنى !! صلاح مين يا عم ؟؟
* أنا صلاح ... ابن عمتك زينب يا جدع
_ أهلااااااااااااااان .... ازيك يا بو صلاح عامل ايه ؟ ايه المفاجأة الحلوة دى
*أنا تمام الحمد لله ... أنت فين يا عم بقالى اسبوع دايخ عليك و باكلمك مش بترد , و بعدين عرفت أنك سايب البيت من أسبوع و قاعد فى فندق ...

_احم ... ايه يا أبو صلاح احنا على الهوا و الناس سامعين .... عيب كده
* سورى يا سمسم أنا مش هعطلك ... أنا عايزك فى خدمة كده
_ أؤمر يا بو صلاح
* الواد ابنى اتخرج السنه دى , و كنت عايزك تشوف له شغلانه فى الاذاعه عندك ... شغله أى حاجة .... ان شاء الله حتى مطرب مش هاتفرق ... دا حتى الواد موهوب و ييجى منه
_ من عنيا الاتنين يا صلاح .... ابعتهولى فى أى وقت و أنا هظبطه
* ماتحرمش منك يا سمسمتى .... معلش عطلتك عن البرنامج ... يلا كمل كمل انت شغلك و الواد هبعتهولك بكره .... سلام
_ احم ... آآآ و نرجع مع بعض تانى و ناخد اتصال كمان و نقول آلوووو
* أيووه سلام عليكم يابنى
_ و عليكم السلام ... أهلا وسهلا
* و النبى يابنى أدينى الحاجه أم زكريا
_ نعم ؟؟ أم زكريا مين يا حاجه ؟
* يابنى اديهالى بقى ماتوجعش قلبى انت هتستعبط ؟؟ عايزاها عشان عليها قسط الجمعيه مدفعتوش و كده ما يصحش بدل ما آجى عندكوو أعملكوا فضيحة بجلاجل فى الحارة يا عالم يا عرة .....
_ ايه يا ولية انتى فى ايه ؟ احم ... يا مدام ميصحش كده أم زكريا ايه بس
* ايه ده مين معايا انت مش زكريا ؟؟؟ مش دى نمرة أم زكريا اللى فى المدبح ؟؟
_ لا يا ستى النمره غلط ...
* لا مؤاخذه يا بنى معلش ...
_ و لا يهمك يا حاجه ... و بعدين فى الليله الزرقا دى ... ايه اللى بيحصل ده ... احنا بنعتذر طبعا عن المكالمات الغلط دى ... معانا تليفون كمان (يارب يطلع صح المره دى ) آلوو
* مساء الخير
_ مساء الخير ... نتعرف بيك
* معاك أحمد على لطفى الدمنهورى ....
_ أهلا بيك يا بو حميد ... بتكلمنا منين ...
* باكلمك من البيت .. يعنى هكون باكلمك منين فى ساعة زى دى !!
_ ما تخلص يا عم الظريف , بيتكوا ده فى انهى داهية يعنى ؟!
* أنا ساكن فى امبابه بس أنا أصلا من شبرا بس لسه معزلين منها من أسبوعين بس... أصل الشقة كانت قبلى و حر قوى و ضيقه و كده ... و احنا 8 أخوات حضرتك و .....
_ايه يا عم أنت .... أنا مالى و مال الشقة اذا كانت ضيقة ولا واسعة ... الكلام ده تقوله للمحافظ مش هنا .....الله يحرق دى حلقه منيله بنيله .....
* ايه ياسمسم مالك قافش ليه كده .... مش بافضفضلك يا أخى مش انت قلت ان الحلقة مفتوحة و كل واحد يقول مشكلته
_ آه يا خويا اتهببت قلت انها متنيلة مفتوحه ... بس كان قصدى المشاكل العاطفية مش أزمة الاسكان !! المهم بقى حضرتك عايزنى أشوف لك شقة أوسع و لا ايه ؟
* آه و النبى ينوبك فيا ثواب دا احنا متبهدلين خالص .... بس وحياة أبوك تكون فى مدينة نصر و تكون أربع أوض و 2 حمام و أهم حاجة ماتكونش فى دور عالى عشان أمى بتتعب من طلوع السلم
_ بس كده ؟؟ لا بسيطة ...مش عايزنى أفرشها لك بالمرة ؟؟!!!!
* لا يا عم مش للدرجة دى .... احنا عفشنا موجود .... هو احنا بنشحت ولا ايه .....لالالالا كده أزعل منك
_ حقك عليا يا سيدى أنا غلطان
خلاص خلاص و لا حقى عليك و لا حقك عليا يالا عشان أنا مش فاضى بقى يا سمسم , أنا هسيسب نمرتى فى الكنترول رووم و لما تييجى الشقة تبقى تكلمنى .. أوك ؟ يالا باى
( نأسف لقطع البرنامج و لكن أسامة دلوقتى أغمى عليه و نقلناه المستشفى مش عارفين ماله )

» ايه رأيك فى أسامة منير والبرنامج بتاعه
» اغاني محمد منير والشاب خالد من حفلة اخبار اليوم