مرشح اخر للرئاسه

مرشح اخر للرئاسه
أما لو كنت ابقي ريس كنت اعيش الدور كويس
واكتب الدستور بايدي لأجل مبقاش فيه موسوس
واللي هايرجعوا عليه يكون فقيه مخلص كويس
واحكم الناس مدتين بالدقيقه محسوبين
أو كفايه مده واحده يعني ميصحش اغلس
أما لو كنت أبقي ريس كنت أحكم ع الوزير
يسكن العزبه البعيده والمواصلة جوز حمير
لأجل يشعر بالغلابه والصغير والكبير
يأكل العيش في المنشه والغموس فجله وجبنه
أصل بيقولوا المفاسد طبعها الاكل الكتير
أما لو كنت ابقي ريس كنت احكم بالاصول
كنت اخلي العدل يمشي زي ما القاضي يقول
والشاويش يلزم حدوده ان كان أمين او حتي صول
والرتب تقرأ القانون قبل ما تروح السجون
يبقي فيه رحمه ف قلوبهم والامان عمره يطول
أما لو كنت ابقي ريس كنت استغفر يوماتي
كنت أزور كل المقابر وافتكر الموت ليلاتي
واعرف ان الدنيا فانيه مهما أملي في حياتي
وافتكر يوم الحساب وافتكر نوم التراب
وان ظلم الناس هايفضل هو أسوأ سياتي